ಇದು ಮಧು ಶಾಲೆ

ಕನಸೊಂದು
ಅರಳಿದ್ದು ಇಲ್ಲಿಯೇ..
ಬದುಕೊಂದು
ಕಮರಿದ್ದು ಇಲ್ಲಿಯೇ

ಹೊಸದೊಂದು ಶೋಧ
ಹುಟ್ಟಿದ್ದು ಇಲ್ಲಿಯೇ
ಜೀವನದಲಿ ಸೋತ ಯೋಧ
ಸತ್ತದ್ದು ಇಲ್ಲಿಯೇ

ಸಿಕ್ಕ ಚೂರು ಪಾರು ಖುಷಿಗಳ
ಸಂಭ್ರಮವು ಇಲ್ಲಿಯೇ
ರಾಶಿ ರಾಶಿ ದುಃಖಗಳ ಮರೆಸುವ
ಭ್ರಮೆಯೂ ಇಲ್ಲಿಯೇ

ಜಾತಿ ತತ್ವಗಳ ಎಲ್ಲೆಗಳಿಲ್ಲದ
ವಿಶ್ವಮಾನವರು ಸಿಕ್ಕುವುದು ಇಲ್ಲಿಯೇ
ಯಾರದೋ ಕೇಡಿಗೆ ಯಾರದೋ ಸಾವಿಗೆ
ಮಹೂರ್ತವಿಕ್ಕುವುದೂ ಇಲ್ಲಿಯೇ

ಇದು ಮಧು ಶಾಲೆ
ಎಲ್ಲವೂ ನನ್ನದೆ,
ಯಾವುದೂ ನನ್ನದಲ್ಲವೆನ್ನುವರ ನೆಲೆ
ಒಮ್ಮೆ ಹೊಕ್ಕರೆ ಹೊರ ಬರಲು ಬಿಡದ ಜೇಡರ ಬಲೆ